ကိုနေနော် အခု ဘာစာအုပ်တွေရေးနေပါသလဲ--- လုံးချင်းလား? ၀ထ္ထုတိုလား?

အခု--၀ထ္ထုတိုပေါင်းချုပ်တစ်အုပ် ထုတ်နေပါတယ်။ သင်္ကြန်ပြီးရင်တော့ ဖြောင့်ချက် ဆိုတဲ့ ကဗျာစာအုပ် ထွက်ပါမယ်။ ဖြောင့်ချက်ပြီးရင် လုံးချင်း တစ်အုပ်ထွက်ပါမယ်။ ဆက်တိုက် ထုတ်ဖြစ်ပါမယ်။

လွန်ခဲ့တဲ့ ၅နှစ်လောက်အတွင်းမှာ စာအုပ်ထွက်တာ မတွေ့ရဘူးနော်--စာအုပ်မထွက်ဖြစ်ရုံပဲလား ?-စာကို မရေးဖြစ်တာလား ?

လုံးဝမရေးဖြစ်သလောက်ဖြစ်သွားတယ်--- 2000 ခုနှစ်လောက်မှာ တစ်အုပ်ထွက်ပြီး 2003 နောက်ပိုင်းကစပြီး မထွက်ဖြစ်တာပေါ့ အရေးပါ ရပ်သွားတယ်။ အခု ၁ နှစ်လောက်အတွင်းမှာမှ ပြန်ရေး/ပြန်ထွက်ဖြစ်တာပါ။

အစ်ကိုရဲ့ စာရေးသက် နှစ် ၂၀ ရှိခဲ့ပြီဆိုတော့ စပြီး ရေးဖြစ်တဲ့ကာလတုန်းက ရေးတဲ့ပုံစံနဲ့ အခုအချိန်မှာ ဘယ်လိုတွေကွာသွားပါသလဲ?

အခုပြသနာကအဲဒါဖြစ်တာ ရေးမရဘူးဆိုတဲ့ပြသနာပေါ့။ စပြီးရေးကာစတုန်းက ရေးချင်သလိုရေးခဲ့တာ---အခုစာရေးသက် နည်းနည်းရလာတော့ ရေးသင့်တာကို ရေးတာ---ရေးချင်သလိုရေးတုန်းက shock မရှိဘူး။ ရေးလည်းရေးဖြစ်တယ်ပေါ့နော်--အလုပ်လည်းလုပ်ဖြစ်တယ်-- အခု ရေးသင့်တာပဲရေးတော့မယ်ဆိုတော့တစ်မျိုးပဲ--- ကိုယ့်ဘက်ကရေးချင်ပေမယ့် ရေးလို့မကောင်းတဲ့ဟာမျိုးဖြစ်နေတဲ့ အကန့်အသတ်တွေရှိနေပြီ ဆိုတော့လေ---အရင်တုန်းက ကိုယ်ကလည်း လူငယ် ဖြစ်နေတော့ ဘာမှနားမလည်ဘူးလေ---ရေးချင်စိတ်တစ်ခုထဲနဲ့ ရေးတာ---ရေးချင်တာတွေ အကုန်လုံးရေးဖြစ်တယ် -- အခု ရေးသင့်တာပဲရေးတော့မယ်ဆိုတော့ ကိုယ့်ခေါင်းထဲမှာက ရေးချင်တာတွေဝင်လာပေမယ့် မရေးသင့်ဘူးထင်နေတယ် --- အဲဒါပဲ -- ပြသနာက အဲဒါပါပဲ--- စာရေးသက်နည်းနည်းရလာပြီဆို တော့ ရေးဖို့အကြောင်းအရာတွေကို ရွေးလာဖြစ်ခဲ့တယ်။

နောက်တစ်ခုက အစ်ကိုအနေနဲ့ စာရေးဖို့ ချဉ်ခြင်းကော ပြောင်းသွားသေးလား--- တက်ကြွမှုပေါ့-ကျွန်တော့်တို့ ငယ်ငယ်တုန်းကဆိုရင် အကောင်းမြင်တာများတယ်လေ လုပ်ချင်တာကို မဖြစ်ဖြစ်အောင် လုပ်မယ်ဆိုတဲ့စိတ်မျိုးပေါ့--တက်ကြွမှုများတယ်ပေါ့--အဲဒါမျိုးကို ပြောတာပါ။

အင်း --- ရူးသွပ်မှုတော့ နည်းနည်းလျော့သွားတယ်--ဘာကြောင့်လည်းဆိုတော့ လူဆိ်ုတာ သိတဲ့ အကြောင်းအရာများလာလေ လုပ်ဖို့ကြောက်လာလေလေပဲ---ငယ်ငယ်တုန်းကတော့ မြွေမကြောက် ကင်းမကြောက်ပေါ့ လုပ်ရဲတယ်--- အခုအသက်နည်းနည်းရလာတော့ သိတာတွေပိုများလာတော့ ဥပမာပေါ့--- ငယ်ငယ်တုန်းကဆိုရင် နေပူတာလည်း ဂရုမစိုက်ဘဲ ဦးထုပ်တွေ ထီးတွေမဆောင်းဘဲ ဒီအတိုင်း “ဒိုး” တာပဲ။ အသက်လေးလည်း ရလာရော သွေးတိုးတာတို့ နေရောင်ခြည်ဟာ အရေပြားကင်ဆာ ဖြစ်နိုင်တာတို့ အဲဒါမျိုးတွေ သိလာတော့ နေပူထဲထွက်ရမှာကို ကြောက်လာတယ်။ အသိများရင် လူက တွေဝေလာတယ်-- အဲဒါကြောင့် အသိများရင်မကောင်းဘူးလို့ ပြောကြတာပေါ့---- အခု စာရေးကြဲသွားတယ်--အရေအတွက် နည်းသွားတယ်ဆိုတာ အဲဒါပါပဲ--သိသင့်တာထက် ပိုပြီးသိလေ -- ပိုပြီးမလုပ်ရဲလေ ဖြစ်လာတာပေါ့---

အရင်တုန်းက အစ်ကိုရေးတဲ့စာတွေထဲမှာ အစ်ကိုရဲ့အတ္တကို တစ်နည်းတစ်နည်းနဲ့ တွေ့ရတတ်တယ်--- အခုကော အဲဒီအတ္တတွေ ရှိသေးသလား? အတ္တကော ပြောင်းသွားပြီလား?

ပြောင်းသွားပါပြီ -- အခုက တစ်မျိုးဖြစ်သွားပါပြီ---

အခုရေးနေတဲ့အမျိုးအစားကို သတ်မှတ်မယ်ဆိုရင် ဘယ်လို စာပေအမျိုးအစားလို့ သတ်မှတ်မလဲ?

ဝတ္ထုအမျိုးအစားကို ဘယ်လိုသတ်မှတ်မလဲ ? ရေးနည်းရေးဟန်ကို ဘယ်လိုသတ်မှတ်မလဲ?

အဲဒါက ကမူး ပြောဘူးတယ်နဲ့တူတယ်--- အရာဝတ္ထုတစ်ခုကို အမည်နာမတစ်ခု ပညတ်လိုက်မယ်ဆိုရင် အဲဒီအရာဝတ္ထုကို ဖန်တီးလိုက်တာဖြစ်သလို ဖျက်ဆီးလိုက်တာလည်း ဖြစ်တယ်တဲ့--- အခု ရေးတဲ့ဟာကို သတ်မှတ်မယ်ဆိုရင်တော့ မဖြစ်နိုင်တာတွေကို ဖယ်လိုက်ရင် ဒီဟာက Realisiam တော့ မဟုတ်ဘူး--- ဘ၀ သရုပ်ဖော်တွေကို မရေးဖြစ်တာ ၁၀ နှစ်လောက်ရှိပြီ၊-- နောက်တစ်ခုက Post Modern လည်း အရမ်းကြီးမဟုတ်ဘူး---Magic Reason လည်းမဟုတ်ဘူး Modern တော့ Modern ပဲ-- Post Modern စစ်စစ်ကြီးတော့လည်းမဟုတ်သေးဘူး---အဲဒီဘက်ကိုတော့သွားတယ်---လက်ရှိခေတ်ပြိုင်ခံစားမှု အကြောင်းအရာ တွေတော့ ပါတယ်---သေချာတာကတော့ Fiction တော့မဟုတ်ဘူး။ ရှေးခတ်က လူထူးလူဆန်းအကြောင်းမျိုးတွေ မပါဘူး။

အစ်ကို အင်တာနက် သုံးဖြစ်သလား ? သူ့ရဲ့အသုံးဝင်မှုကို ဘယ်လိုမြင်ပါသလဲ?

အစ်ကိုမြင်တာကတော့ အရင်တုန်းက မိုဘိုင်းဖုန်းတွေ မပေါ်ခင်တုန်းကတော့ ဖုန်းမရှိလည်း ပြသနာမရှိဘူးလေ--အခု မိုဘိုင်းဖုန်းတွေပေါ်လာတော့ ဖုန်းက မရှိမဖြစ် ဖြစ်လာတယ်--အဲဒီလိုပဲ လူတစ်ယောက်ရဲ့ဘ၀အတွက် အင်တာနက်ဟာလည်း မရှိမဖြစ် Essential ဖြစ်လာမယ်-- မြန်မာနိုင်ငံအနေနဲ့ နောက် ၅ နှစ်ဖြစ်ချင်လည်း ဖြစ်မယ် -- ၃ နှစ်ဖြစ်ချင်လည်းဖြစ်မယ်--

အစ်ကိုတို့ စာရေးဆရာတွေဆိုတာ အဆိုတော်တို့ သရုပ်ဆောင်တို့လို ပရိတ်သတ်နဲ့ တိုက်ရိုက် ထိတွေ့မှုနည်းတယ်လေ-- အခု ကျွန်တော်တို့ရဲ့ Shwe Gyoe Phyu Online ကနေတစ်ဆင့် ပရိသတ်ကို ဘာများပြောချင်ပါသလဲ?

ပြောချင်တယ်---အစ်ကိုမှာလည်း ၆တန်းကျောင်းသူ သမီးတစ်ယောက်ရှိတော့ လူငယ်တွေအတွက် အဓိကထားပြီးပြောချင်ပါတယ်---အခုဆိုရင် တစ်ချို့စာအုပ်တွေက ကလေးတွေအတွက် တော်တော် အန္တရာယ်ဖြစ်စေတဲ့ စာအုပ်မျိုးတွေ---၊ အခုဆို ပိုဆိုးတာပေါ့။ တစ်ချို့ဆို စာကိုဓာတ်စီးပြီးရေးတာတို့၊ -- နောက် ဒီစာကို ဖတ်ရင် ရှုးပေါက်ဖို့အသင့်ပြင်တို့ --- အဲဒီလောက်အထိ ကြောင်ရဲတာတွေ ရှိတယ်လေ။ --- အဲဒါမျိုးတွေပေါ့--- ကိုယ်တို့ငယ်ငယ်ကလည်း စာဖတ်တယ်ဆိုတာ အပျော်ဖတ်တွေကစခဲ့တာပါပဲ-- ဘာပဲပြောပြော --- ဒီလှေကားထစ်ကိုတော့ ဖြတ်ရတာပဲလေ---။ အဲဒီလှေကားထစ်မှာ ရပ်တန့်မနေဖို့တော့ သတိပြုရမယ်၊ ဒီလှေကားထစ်ကို မြန်မြန်တက်မှ နောက်တစ်ဆင့်ကို ရောက်မှာပေါ့-- အဲဒါလေးတော့ ကလေးတွေ ခေါင်းထဲမှာ ထည့်ဖို့လိုမယ်။ ၆-တန်းကျောင်းသူ၊ ၉-တန်းကျောင်းသူလိုအရွယ် လူငယ်တွေအတွက် ဘယ်လိုမှဖတ်လို့ မသင့်တော်တဲ့ မဖွယ်မရာဇာတ်ဝင်ခန်းတွေကို စာအုပ်ထွက်ရင်ပြီးရော ရေးနေတာကို တွေ့ရတယ်--အဲဒါတွေကြောင့်လည်း အစ်ကို အနေနဲ့ စာပြန်ရေးဖြစ်တာပါ--

လွန်ခဲ့တဲ့ ၂၀၀၀ ခုနှစ်မတိုင်ခင်ကနဲ့ အခု ကာလမှာ စာဖတ်ပရိသတ်ရဲ့ ပုံစံ၊ စာဖတ်ပရိတ်သတ်ကြီးရဲ့ character ပြောင်းသွားတယ်လို့ မြင်မိပါသလား?

ပြောင်းသွားပါတယ်--- ဘယ်လိုပြောင်းသွားလဲ ဆိုတော့ --- အဲဒါလေး နည်းနည်းပြောချင်တယ်။  အခုလူနေမှုစနစ်နဲ့ ဖြတ်သန်းတဲ့အခါမှာ အမြန်သုံးအစားစာ instant food တွေပေါ်လာတယ်၊ တစ်ခါသုံး ပစ္စည်းတွေ ပေါ်လာတယ်။ ဒါ သူ့လူနေမှုဘ၀နဲ့ လိုက်လျောညီထွေဖြစ်အောင် convenience ဖြစ်အောင် ပေါ်လာတာ။ အဲဒီလိုမျိုးပေါ့--- စာပေထဲမှာလဲ ပေါ်လာတယ်။ ပေါ့ပေါ့ပါးပါးနဲ့ တစ်ထိုင်တည်းဖတ်လိုက် -- ပြီးရင် ခေါင်းထဲက ထုတ်ပစ်လိုက် --- အဲဒီလို စာပေမျိုးတွေပေါ်လာတယ်--- ပေါ်လာတော့ ဘာဖြစ်သလဲဆိုတော့ တအားကြီးလည်း ကလေးတွေက မတွေးချင်ဘူးလေ--- စာတစ်ကြောင်းကို အချိန်အများကြီးယူပြီး မတွေးချင်ဘူး၊ တစ်ကြောင်းခေါင်းထဲဝင် -- အဲဒီအဓိပ္ပာယ်ကိုလည်းသိ -- အဲဒီလိုစာမျိုးတွေ ပေါ်လာတော့ --- junk တွေပေါ့နော်--- အမှိုက်တွေဝင်လာတယ်။ အဲဒီအခါမှာ sex နဲ့ဆွဲဆောင်မယ်--- ညစ်တီးညစ်ပတ် joke တွေနဲ့ ၀င်လာတယ်။ အဲဒါကို ကလေးတွေက side-effect တွေပါလာတယ်ဆိုတာ သတိပြုရမယ်-- ခေတ်ရေစီးကြောင်း အရလည်း အဲဒါတွေကို မဖတ်နဲ့လို့တားလို့မရဘူးလေ-- တားရင်လည်း ရေးစီးကြောင်းနဲ့တိုက်ပြီး ကိုယ်ပဲကြေမွသွားမှာလေ--- ဒီတော့ အဲဒါလေးကို သိဖို့လိုတယ်။ သာယာသွားမှာစိုးလို့ ---။

အခုခေတ်မှာ မိန်းကလေးတော်တော်များများရဲ့ အ၀တ်အစားပုံစံတွေ ပြောင်းလဲလာတာနဲ့ ပတ်သတ်ပြီး လူကြီးတစ်ယောက်အနေနဲ့ ဘာများပြောချင်ပါသလဲ၊ ခေတ်အရပဲလား? ဒီအတိုင်းပဲ ကြည့်နေရမှာလား ? ပြောပေးပါ ---

ဒါက culture နဲ့ ဆိုင်တယ်--- လည်ကတုံးအင်္ကျီပဲဝတ်ရမယ်ဆိုတဲ့ ပုံစံမျိုးက ကျောင်းတွေ/ ရုံးတွေ မှာပဲလုပ်လို့ရမယ်--- လမ်းပေါ်ကလူတွေကိုတော့ သွားပြီးလုပ်လို့မရနိုင်ဘူး---ဥပဒေပြဌာန်းလို့လည်းမရဘူး---ယဉ်ကျေးမှုနဲ့ဆိုင်တယ် --- ကိုယ်တို့ဆီမှာ မတူညီတဲ့ ယဉ်ကျေးမှုတွေဝင်လာတယ်။ အဲဒါတွေက ယူတယ် မယူဘူးဆိုတာ လူနဲ့ပဲဆိုင်တယ်။ ဒီကလူတွေ နေ့စဉ်ကြည့်တဲ့ TV ဇာတ်လမ်း၊ ဖတ်တဲ့ မဂ္ဂဇင်း၊ ဂျာနယ်၊ ၀တ္ထု တွေထဲမှာ ဒီကိစ္စကို ပြောရေးဆိုခွင့်ရှိသူတွေက ပြောမယ်ဆိုရင်တော့ ကလေးတွေအတွက် ပြောင်းလဲကောင်း ပြောင်းလဲသွားနိုင်ပါတယ်---- အစ်ကိုတို့ငယ်ငယ်တုန်းကလည်း တအားပူတဲ့ နွေရာသီကြီးမှာ ဂျင်းန်းဘောင်းဘီရှည်တွေ -- လည်သာဂျက်ကင်တွေဝတ်ခဲ့တယ်--- အပ်စပ်တယ် မအပ်စပ်ဘူးဆိုတာ မစဉ်းစားခဲ့မိဘူး--- ဒါကို ရင့်ကျက်မှုရှိတဲ့ လူကြီးတွေက ကလေးတွေနားလည်အောင် ရှင်းပြရမယ်---ဥပဒေထုတ်လို့တော့ မရနိုင်ဘူး----အနုပညာထဲကနေ ပြောရမယ်--- ဥပမာ - Hip Hop ဂီတဆိုရင် အခုလူငယ်တွေကြားထဲမှာ ပေါက်ကွဲပြန့်နှံ့နေတယ်-- ဒီအတွက် Hip Hop ဂီတကိုဖန်တီးတဲ့ ဆရာလေးတွေကလည်း သီချင်းထဲမှာ မြန်မာဟာမြန်မာပဲလို့သိအောင် ထိန်းထိန်းသိမ်းသိမ်းနဲ့ ပြောပြသင့်တယ်---၀တ္ထုတွေ မဂ္ဂဇင်းတွေထဲမှာလဲ ဒီအကြောင်းအရာတွေကို နည်းနည်းပြောပြသင့်တယ်--- ဟိုအရင်က ဆရာငြိမ်းကျော်တို့--မောင်မောင်မြင့်လွင်တို့ရေးတဲ့ စာတွေထဲမှာဆိုရင် ပင်နီတိုက်ပုံဝတ်ပြီး ဆေးပေါ့လိပ်ကြီး ခဲထားတဲ့ လွယ်အိတ်ကြီးလွယ်ထားတဲ့ ဇာတ်ရုပ်တွေ အမြဲလိုလိုပါတယ်--အခုခေတ်ဝတ္ထုတွေထဲမှာက သူ့ရဲ့ဇာတ်ဆောင်မင်းသမီးကို လှပစေချင်ဇောနဲ့ စကပ်တိုတိုလေး ၀တ်ပေးထားတာမျိုးကို အခုခေတ်လူငယ်တွေက သိပ်ပြီးအတုယူတတ်တယ်၊ သူတို့ရဲ့ idle လူတွေက ဒီပုံစံမျိုးတွေချည်းပဲဆိုရင်တော့ သွားမှာပဲ --မြို့ထဲမှာနေတဲ့သူ တွေက ပိုဆိုးတယ်--- လူတိုင်းဝတ်နေကြတဲ့အတွက် မ၀တ်နဲ့လို့ သွားပြောလို့လည်းမရဘူး --- ပြောတဲ့လူက အထူးအဆန်းဖြစ်နေမယ်။ အရက်ကြော်ငြာ - ဘီယာကြော်ငြာတွေမှာဆိုရင် ပိုဆိုးတယ်--ဒါပေမယ့် မူးယစ်စေတတ်တဲ့ အရာကို sex နဲ့တွဲပြီး ကြော်ငြာတဲ့ Idea ပါပဲ--စီးပွားရေးရှုထောင့်ကဆိုတော့လည်း အပြစ်တော့ပြောလို့မရဘူး-- အဲဒါက ဘာကိုသွားပြီး သက်ဆိုင်လည်းဆိုတော့ company ကတော့ အဆုံးစွန် အသုံးချချင်မှာပဲ -- ဒါကို Actor တွေဘက်က မူတစ်ခုတော့ရှိသင့်တယ်--- ငါတို့ကို ဟိုဟာဝတ်--ဒီဟာဝတ် ဆိုတာမျိုးလက်မခံသင့်ဘူး---အခုတော့ သူတို့က popular ဖြစ်ချင်ဇောနဲ့ ဘာမူမှမရှိတော့ဘူး--- ဆင်ဆာကသာခွင့်ပြုမယ်ဆိုရင် Bikini၀တ်ပြီးရိုက်မယ့် ပုံစံတောင် ဖြစ်နေတယ်--- အဲဒီတော့ ရှေ့ကလူက သွားတဲ့နောက်ကို နောက်လူက ပုံစံယူလိုက်လူမှာပဲ---။ ရှေ့နွားက ဖြောင့်ဖြောင့်သွားဖို့လိုမယ်။ ကိုယ်တို့ဆို ရှေ့နွားဖြစ်နေပြီလေ၊ ကိုယ်သွားတဲ့ပုံစံကို ကိုယ့်သားသမီးတွေ ယူမှာပဲ။ ဒါကြောင့်ကိုယ့်ကိုယ်ကို ရှေ့ကသွားတဲ့လူလို့ မှတ်ယူရင်တော့ ကိုယ့်ခြေလှမ်းကို ဂရုစိုက်ရမှာပဲ ---

အစ်ကိုစာရေးတဲ့အခါ ပရိတ်သတ်ကို အသိပညာပေးချင်လို့၊ ပြုပြင်ချင်လို့ဆိုတဲ့ ပုံစံမျိုးနဲ့ ရေးခဲ့ဘူးလား ? ဇာတ်ကိုတွေကို ပုံစံချခဲ့ဘူးလား ?

အဲဒီလိုတော့ မရေးခဲ့ဖူးဘူး။ အဲဒါမျိုးတွေ ပြောချင်ရင် အင်တာဗျူးမှာ ပြောတယ် --- ဆောင်းပါးရေးပြောမယ် --- ရသထဲမှာ တော့ မရေးဘူး --- ဒါပေမယ့် သေချာတာကတော့ ကိုယ့်ဇာတ်ကောင်တွေဟာ ကလေးတွေ အတူယူ မှားလောက်တဲ့ ဇာတ်ကောင်မျိုးမဟုတ်ဘူးလို့တော့ ပြောနိုင်တယ် ---

ဒီလောက်ဆိုရင် တော်တော်ပြည့်စုံသွားပါပြီ ---- အချိန်ပေးပြီး ပြောကြားပေးတဲ့အတွက် ကျေးဇူးတင်ပါတယ် --- နောက်လည်း အလျဉ်းသင့်သလို တွေ့ဆုံပါရစေ ---